《電話約會》
有日，接到同行電話。
「你好啊溫小姐！我係XX銀行客戶經理，我姓陳！最近有啲優惠介紹返，想同你免費升級做XX理財。」
「吓......我戶口得幾百蚊咋喎，升咩級啊？」哥仔你冇打錯？不過見係行家，就傾多兩句。
「無錯，就係我哋銀行做緊特別推廣，可以免費升級，升級之後仲可以有XXXXXXXXXX優惠(下刪1000字)......」
「咁升級咗之後我戶口無一百幾十萬會唔會扣錢㗎？」
「我哋係首年免手續費嘅！」
咁......即係就算升級完一年之後又要去downgrade返啦，咁鬼煩，都係唔升啦。
「Er......唔使啦唔該。」
「點解呀？升級咗之後我會專門跟進你戶口情況，定期提供返啲理財意見。不如同你約個時間做返個升級？」
原來友行搵食咁艱難，連我呢啲戶口得雞碎咁多嘅人都唔放過。雖然我好同情你，但......長貧難顧啊朋友！
「我......唔得閒......」其實我好窮㗎咋！
「咁唔知你幾時先得閒呢？」
「唔使啦唔該。」
「我會好認真睇住你戶口㗎！」其實我日日都好認真睇緊我戶口嘅，但我真係自身難保啊！
「Byebye......」
「真係唔約個時間見面？」老老實實，你係咪暗戀我啫？！
「不如......?」
「嘟～～～～～」
Sorry，雖然咁大個女都未試過比一個金融才俊鍥而不捨咁約我，但我真係頂唔順賴死唔收線，同埋......我唔想見你。
#銀行小妹甩轆日記
#新書將有更多絕密未曝光內容
#書展有售
Search